上樂華踢波，有我、仁、強、Lonson、聰、大衛、禎、F4，入左一球，始終隻腳未好返唔跑得多，之後去左食大排檔，無啦啦唔知做咩講蒲苔島太郎的故事！

生日快樂呀朗朗！

起身去左APM行，買唔到睇中果件禮物，搭車去返銅鑼灣買，中間Actual打黎話佢屋企無人，叫我上去玩，我正好仲煩緊買完野做咩好，因為唔想出黎咁早就走！買完野就搭603上左嘈家打邊爐，點知個爐壞左，我就返屋企拎我果個上去啦，終於有得食，有我、嘈、強、禎、東(呢一晚佢仲係叫"Actual個friend")，嘈細佬同佢個朋友張敬軒(真係好似樣)，阿強一早走左，剩返我地就玩鬥地主、骰盅(Lucky、(即學)一六、等等，我好明顯又係衰無運行，不過發玩禎哥弱點，十五二十)！之後又玩埋21點，玩到天光齊點，同禎哥食埋M記先走！

晏晝食左件三文治，Actual打黎邀請我上Millennium Restaurant，一個俾學生實習o既餐廳，原來今日係Tracy做service，唔怪得會拉大隊上去啦，一行人有我、Actual、Ginny、Yvonne、牛牛、Wendy(我唔知有無打錯/打漏呢)，食左個Set，有：Cream of Mushroom Soup with Toasted Pine Nuts、Roast Pork Loin with Caramelized Apple Rings and Roast Jus、Classic Brownies with Homemade Vanilla Ice Cream仲有一杯drink添，埋單好似70左右，都ok啦，間中下幾好！仲有杯唔知咩特飲！值得再去食呀！

放左去約左Ginny去買Actual的生日禮物，揀左去銅鑼灣，行左SOGO，銅鑼灣中心、柬角站、Time's Square等等，仲o係SOGO門口撞到同事Ricky & Frances，行到肚餓去左金百利間"易牙妙手"度食，Actual話呢間好好食，試下啦，叫左兩個set，都唔錯丫，不過我地都食唔晒！食完再行左陣，買左一件禮物，剩返o既我同Ginny講好分頭再去買！送左Ginny返Hall我就歸家了！

放工去左美麗華訂Actual個生日蛋糕，原來得15個英文字，好彩都諗到寫咩！試左N咁多種味，先揀到兩隻Actual應該鐘意o既！之後買埋禮物俾阿朗！就去左安達CEO會合大家，今晚有主角朗朗，同埋馬、秀英、寶盈、仁、強、禎、Lonson、嘈、大衛、Phoebe、我，又唱歌又打Winning Eleven，不過高潮係禎哥唱烏冬公公，超爆笑！阿強、馬爺、禎...都發覺嘈好似有D唔妥，大家都好關心Actual，希望佢無事啦！

晏晝o係小肥羊食左公司o既中秋飯，4點幾放工就返屋企啦，阿仁撩睇《烏冬廚神》，不過得7點2，食完飯都睇唔切，無辦法！正當諗住呢中秋無節目之際，Actual打黎問有咩搞，仲提議去打牌或者o係街度玩骰盅，結果問左觀塘雀會跟平時一樣收費，夜晚就去左玩啦，有我、嘈、強、禎、馬，Phoebe話同佢男友黎，結果無到，Lonson又誤會左我地就佢黎坐唔唔到結果都無黎到，5個人打左16圈，有兩舖十三么(其中一次係我食的)，真係得人驚！打到8點夠鐘先走，去埋祥榮食早餐，呢個中秋都算神奇，不過我都叫做望左個滿月，一眼咁多啦！

乜事都無發生，禎哥o係自己大日子去左補領身份證，聽講仲行埋Megabox，話說佢呢一日係請左"考試假"的！點都好，生日快樂啦，舊o既唔去新o既唔o黎，咪當送舊迎新囉！

話說我地今日約左踢波，有我、仁、禎、Lonson、大衛，樂華無得踢就轉去康寧啦，禎哥話行過去，5分鐘就到啦，我地講5分鐘一定唔到，講下講下就去左搭綠Van，上左車禎哥同我講：個Liverpool袋係咪好靚呢？新買架！(點解要提呢一幕呢，睇埋落去啦)o係康寧踢左一陣，我入左一球就因傷唔踢得，大家又各自因傷等踢得唔好，終於踢到落雨就走啦，去左M記飲野，禎哥就伸手入佢袋度拎左電話黎玩，佢之前唔見左電話要問我抄返喎，但唔知點解佢抄左個叫"Phonbe"的電話，我好似無呢個名喎！(點解又要提呢一幕呢，繼續睇埋落去啦)跟住同左阿仁去裕民中心搵鬚刨，中途Lonson唔知做乜跌左廿蚊，跟住行上豐澤先買到，當中個店員介紹阿仁鬚密買三刀頭會剃得乾淨D，禎哥就爆左句：我好羡慕你咁多毛！笑死！跟住o係豐澤同OK都撞到Sunny，Lonson又買左個麵包，放左入阿仁袋鬚刨個豐澤袋，阿仁見大雨驚整濕個鬚刨就成袋放左入禎哥個新袋入面啦！(相同o既說話唔講啦，睇落去啦)跟住我地入左一間餐廳，我食左個唔錯的冬陰功湯麵，禎哥都想叫野食o既時候，佢發現...銀包唔見左！跟住Lonson幫佢睇下個袋有無攝住，發現佢個袋異常"朽較"，白鞋污糟衫唔搵野袋住就放入個袋度，結果阿仁個鬚刨，仲有入面Lonson個麵包，都蘊藏住禎哥o既氣味！禎哥原來一直將個包放o係最出面果格，唯有打去cut卡，我地就陪佢冒住大雨去返M記、康寧(仲要逐個垃圾筒打開去搵)，都搵唔返佢個銀包，最後佢只能問阿仁借錢返屋企！我地三個返去換左衫就落蘭記睇Man. United VS Chelsea的英超比賽，結果Chelsea無左Mourinho完全唔掂，淨輸兩球！

晨咁早五點半就"拮"左起身，因為約左大家六點九官小出發去睇阿傑o係警校o既畢業禮，馬爺幫我買左麥記早餐，差唔多食晒果陣何生架車先黎到，都幾乎七點了！呢一刻o既人有：(朗車)朗、馬、嘈、Phoebe、強、禎(柏霖車)柏霖、仁、Lonson、我共十人！柏霖落左東九龍走廊又差D唔記得轉線入海隧，睇黎呢個位佢真係好唔熟喎！總算安全抵達黃竹坑，Join埋大衛，跟住就入去警校啦，話說D場券有D問題，阿仁不知幾騰雞，不過結果當然係乜事都無啦！

入左警校坐低左，勁猛太陽，又無得坐，嘈、強、馬、B就捉飛行棋hea時間，我就同Lonson佢地出左去買野飲，俾D工作人員點到頭都暈，入到Canteen原來有紀念品賣，不過我就覺得好普通無買到，我地見Canteen出面有個位有得坐坐少人又唔晒，仲可以望到成個操場，就叫埋其它人過黎！無幾耐畢業典禮就開始啦，我地一路估邊個係阿傑，操左一輪個儀式就完結啦！我地就去搵阿傑影相，仲有Lonson父母同阿傑細佬，同埋阿傑兩個女fans！影左一大輪相之後，Lonson父母先走，其他人就拉隊去香港仔飲茶，阿傑仲帶左佢一個警校朋友，當然呢班咁食得o既人就食左好多好多野啦！講開原來阿傑將會駐守中環區，禎哥一定成日搵你啦！

食完飯阿傑個警校朋友同兩個女fans走左，剩低o既原本打算去石澳BBQ，但唔知點解禎哥話想去雀會，咁就拉隊返觀塘啦，鬼叫生日大晒咩！兩個司機都有事走左，其他人去到開左間孖房，分成人台同兒童台，成人台有Lonson、禎、仁、傑，兒童台就有嘈、B、大衛、強，話說成人台果邊非常精彩，有一筒一筒白板白板、固執的五筒、中華英雄...，當然係禎哥搶晒風頭啦，兒童台果邊又係個D牌靚到暈，非常恐怖！阿仁又有事走先，我地臨走就送禮物俾禎哥，原來阿朗同拉西買左件Liverpool紅色無印字俾禎哥，一次收兩件波衫，你真係好野啦！跟住去左下村上次同阿傑入警校前最後一餐o既地方食飯，不過呢一日D野，超難食！

朝早馬爺話臨時有事去唔到買波衫，叫我幫佢去買，我放工就行左去狸貓度，點知想買果件已經無晒，D店員員話唔會再返貨，唯有出旺角搵！出到去上次比較平果間，又係無晒黑色，過幾日先可能會有，咁唯有去左再貴D果間，終於都買到，黑色Liverpool波衫印埋8號Gerrard加英超章，足足比最平個方案貴多一成有多，不過終算有著落，我咁大個仔都未試過買咁貴o既衫架！

放工約左馬爺去旺角睇禎哥份生日禮物，行左幾間舖，終於諗到個最抵o既方案！之後食左十蚊粉再o係先達行左陣就走啦，唔覺唔筧我都好多年無行先達啦！

樂華踢波，有我、仁、強、禎、Lonson、聰，踢左一陣就又拗到右腳(傷左幾個禮拜啦，平時乜事都無唔記得左又會無啦啦拗到，睇黎有排先好得返)，踢左幾個鐘，踢得一D都唔好，仲要阿仁唔知做咩咁燥，加埋佢果D笑聲，真係...！！！之後落左下村食飯(越南野，阿強已經走左)，禎哥無胃口都食完個飯再食左件勁大蘿蔔糕，佢有胃口一定食埋個糯米飯架！

今日目標係銅鑼灣，落車先去世貿商場行左個圈，跟住過左去金百利，都無野睇到，再去埋Time's Square，由頂行到落底，又係無野睇o既，差唔多7點打俾阿仁睇下夜晚會唔會有波睇，原來佢o係尖咀同Connie唔知做緊乜，佢又好想睇波喎，叫我o係灣仔搵下有咩地方好睇，聽Connie話駱克道一帶應該有D Bar之類o既，點知o係謝斐道發玩左間餐廳，叫3點3茶檔，有得睇now直播，仲要無最低消費，就揀左呢間，三個坐低原來大家都打左底唔肚餓，叫左個沙嗲肥牛粉絲煲，整得幾好食呀，我地睇左Everton vs Manchester United、Portsmouth vs Liverpool、Tottenham vs Arsenal同少少West Ham vs Middlebrough，又叫多左件奶醬多同公司三文治，都好好食，呢間好過蘭記同為食貓好多，可惜o係灣仔咁遠丫，唔係一定成日黎幫襯！

今日係Deep o既Last Day, 佢買左好多零食返黎，真係一檯都係呀！夜晚成班同事去左食Pizza，食完去左間近住麼地道o既Bar，一入門口有條又高又斜o既迴旋轉梯，貓左真係唔使落樓都似！今日好多人到，有我、Florence、Alan、Ricky、Deep、Jason、Nick、Kenneth、Wing、Paulo、Theo(我入黎之前佢已經離開左SMILE)、Kelvin(唔知有無串錯呢，佢o係SMILE做果陣我都仲未入黎)、仲有Roy、Kobi同佢地兩個o既女友、Nicole(開頭我唔認得架，剩係覺得好面善，好似係我一入黎SMILE佢就走啦)同佢o既朋友，有人玩大話骰、圍枚、唱K(上台唱架)...差唔多12點我就同Ricky、Jason、Theo、Kelvin走先，Kelvin要過海，剩係o既就坐Theo車，佢架車好似同朗朗果架一樣架，返到屋企都只係十二點半左右！

今日o係Office切蛋糕，Grad左咁耐都係第一次咋，04年o岩o岩畢業仲搵緊工，05年o係間極小型公司度都唔會有人知我生日，06年咁o岩我又放緊大假未返新工，同Jason兩個九月生日的同事切左兩個餅，唔錯唔錯！

由於去開玩o既cafe《二樓后座》將會易手，我地打算o係佢易手前拉隊上去玩返晚，不過呢排個個都唔得閒，得呢一晚，點知原來有人包左場，我地就改左去奧海城o既《馬泰》食飯！今日有我、大衛、禎哥、馬爺、強、蘇小姐(我唔識佢個名點寫，同埋，生日快樂)、Actual七個人，D野食都ok啦，咁梗係唔夠上次大尾督咁正，其實都唔太差架啦！席間Actual延續佢o係O'Camp學o既IQ題，禎哥又係踩晒陷阱，哈哈！跟住大家送左一墊堆生日禮物俾我，真係好豐富架，有一件用寫左日文字，意思大約係"我今日心情唔好，唔好惹我"o既Tee，一隻有隻狗變身做超人(狗?!)o既杯加一個神奇魔鬼杯蓋，一盒飛行棋+國際象棋，仲有一對耳筒，真係多謝晒各位，尤其係馬爺同Actual，我知你地諗左好耐架啦！食完野，o係奧海城都走唔甩去冒險樂園架啦，今日D手氣仲差過之前，唔通冒險樂園唔鐘意我黎玩？阿強同Actual就勁Lucky，中左好多飛，而家儲左多過7000張啦，犀利呀！

Chris同Iris生日快樂!!!

繼續放工去搵野o既日子，今日係又一城，出左火車咁橋撞到June，原來佢都係黎買野！唔知係Log-on D野越黎越「正常」，定係我而經對新奇o既野要求高左呢，發覺好耐都無見過D又正又過癮o既產品啦，結果，一如所料，又係乜都睇唔中，灰！本來想過埋德福，不過要幫Actual拎張單同舊電俾馬爺，過到去吹左陣水先走！

一早彈左起身，勁精神，九點就返到Poly啦！放工出左旺角睇野，但係無收鑊，食左盒章魚小丸子！夜晚同左馬爺、強、Actaul去左葫蘆館食薑汁撞奶，一流呀！對住一個正直o既大炮同一個助攻手，再加埋一個有果句講果句o既人，注定要做個笨的奸角，仲可以收埋D乜，哈！下次再食過，不過要塞住佢地把口先！XDDDD

出去行左陣，有D眉目了！夜晚約左仁去工廠踢波，仲有Lonson、大衛、禎、朗，踢左幾球人地有場紙收場，禎哥無啦啦發爛渣好大力咁掟個波走，我地話佢咁咪盞撩交打，佢竟然話：係呀，我係撩交打呀，打咪打囉，係咪唔俾丫！真係出左事幫佢手又唔係唔幫佢又唔係！之後轉左去康寧踢，馬爺都黎埋！有人叫我地去大場踢，踢一陣啦，個場真係好大呀，不過都幾o岩我爆一兩下，哈哈，細場無得咁踢嘛！大衛咁硬淨對手有兩人同佢撞完傷左，不過我地見大衛都無犯規，佢地就o係度嘈啦！踢左陣，馬爺入左一球(真係懷疑佢係咪傷架)，根住佢又唔記得跳起左，傷到舊患！呢個時候馬爺同朗又要趕入葵涌比賽，剩低我地五個就去食飯啦，點知阿仁又漏左隻錶o係工廠(佢唔係第一次唔記得拎，但次次都咁好彩執得返)，就打的去執，咁梗係執得返啦！跟住去大家樂食飯，阿仁要儲分換優惠券，就幫我地逐個用八達通俾錢，連收銀姐姐都笑啦！

同阿仁、馬爺、Lonson去左蘭記睇England VS Israel的歐洲國家杯外圍賽，成場波Israel被England圍攻，Wright-Phillips同Micah Richards係咁o係邊線度爆，不過佢地唔算打得好好，係對面打得仲差o者，Joe Cole今場交左兩個靚波，Owen三次黃金機會只係把握到一個，不過果球就係最靚o既一球！雖然唔想England嬴，不過Israel真係抵輸！

終於請Annual Leave啦，當係生日俾自己抖下啦！11點同阿媽去左Megabox間自家客家菜食野，D野食都唔錯啦，收貨！跟住落去換左個銀包！晏晝去郵局寄野，點知D箱得返好大同好細，大果隻又太大個，細果隻又太細個，個職員叫我出出面文具舖買雞皮紙包起佢就算！不過份野又趕住要寄，結果都要幫襯文具舖買左張花紙，就拎去寄啦，原來仲要填報關表，真係o拿手唔成世！幾經波折總算寄左啦(希望唔好掟壞件野啦，真係有少少擔心架)，然後o係隔離間阿波羅雪糕屋食左個乳酪雪糕，藍苺加麥提莎，好味！

之後出左灣仔，行左太原街睇玩具，買左套EVANGELIONo既Q版公仔，幾靚架，又唔係貴喎！之後又行埋灣仔電腦城睇notebook，點解我睇中2果兩部仲係咁貴架，有一部仲得一間有添，遲D唔知買唔買得起添！跟住六點左右，搵唔到人食飯，就搭左914去奧海城，去左食麻酸樂，有個餐有飯有米線有甜品仲有野飲都係$44，原來兩碗野好細咋，先醒起今日無食lunch好肚餓，不過都算啦！差唔多食完阿仁打黎，話黎到喎，我又未飽就等埋佢同Connie啦，o係冒險樂園hea左陣，1200飛都係唔屬於我架啦，中左個300飛算好彩架啦！阿仁黎到就去左食元氣，都唔係食左好多！九點幾就一齊搭過西環食糖水，阿仁又餓鬼上身啦，食完蘿蔔糕又食公仔麵，我就幫手食少少啦！哈哈！一點都未夠就返到屋企，好少可o係西環走咁早架！

唔係好夠訓，個人呆呆下咁，一早同馬爺o係屋企樓下食早餐，又唔記得戒牛肉喎！返到Poly飲左罐coffee，叫好D啦！放工去淘大游弋左陣，就返屋企食飯啦！

九點幾馬爺打黎話朗到左，無咩做就跟埋去睇佢地比賽啦，地點係城門谷，我都唔知係咩地方黎o既！入到去見到對手人多勢眾，馬爺呢邊到十點開波都係得五個球員(我只係觀眾，馬爺上場傷左半月板，本應休戰半年，點不知第二就要復出，即係無得抖，可能係史上第一人，不過佢唔出就開唔到波，因為一隊最少有五個球員先可以比賽)！開波，好明顯，人地打多兩個半(馬爺真係半個都計多)，一場圍攻在所難免，撐左一陣終於失守，半場結果落後4球(大約啦)，班球員都已經無咩心機！我就趁住半場出去射左幾腳龍，右腳仲係痛喎！下半場，打左一陣柏霖先黎到，馬爺亦o係相同時候捱唔到落去，o係放棄比賽同繼續打5個(柏霖出得場)的選擇下，柏霖揀左繼續！完場，八比零！但全場黎睇，真係輪得少，對手o既實力，睇黎可以講係弱，但係呢邊激殘陣，無辦法啦！當中都有射門，搏到幾次角球，對方一次錯誤仲幾乎破到蛋添！真係算係咁囉！跟住返去問阿強拎返部相機，吹左陣水就返去啦！

就在生日的這一天，開始轉去Blogger度寫blog，目標係可以比以前update得多D，又睇下做唔做得到啦！o岩o岩開左facebook無耐，有好多applicatoin玩喎，仲係試緊，不過已經搞到個profile滿滿的，大家有玩/開左account就記得add我啦！

晏晝走左去紅磡食咸豆漿加粢飯，好似差過以前，不過都OK啦！食完諗住行返office，o係路口見到個婆婆，幫佢拉架車仔行左幾條街去回收商(唔知入面裝住D乜啦)，跟住唯有行條小路返去！原來來回紅磡都無想像中咁耐，遲D可以考慮間中過去食下lunch！今日day time完全無生日o既感覺，個心境好冷，個人好呆，又眼訓，真係...

未夠七點放工，落去七仔買野飲竟然撞到嘈，不過好快佢就駛開左我啦！馬爺又話要去深水土步搞搞野，咁我就搭火車o係太子行下先囉！跟住佢地call我就行過去麗都打邊爐！今日大家都好俾面，到場o既有嘈、馬、仁、Connie、禎、Lonson、大衛、強、柏霖，叫到一檯都係，結果梗係食唔晒啦(都唔知到底D野邊個叫)！打完邊爐仲有得切蛋糕，好食呀個餅底，一流！食飽之後同埋馬、嘈、Lonson、強、禎返觀塘金沙打左陣機，我發覺而家金沙D機完全唔o岩玩，到底係我口味唔同左定係我out左呢？返到屋企點幾鐘了！

馬爺17號要入廠維修，呢兩日奉旨停工，原來仲要睇佢半月板邊個位傷，睇下佢有無去冒險樂園咁好彩啦！

多謝各位朋友們的祝賀，非常感謝：(排名不分先後，如有遺漏，還請見諒)拉西、朗、Actual、馬、仁、Connie、禎、Lonson、大衛、強、柏霖、Ginny、Phoebe、Kerina、Ada、Iris、Elsie、Richard、Oscar、Eric...