非常抱歉，我又好耐無update到！而家補返(如果發現有錯漏要話返俾我聽呀)！

行事回顧：

Sun 25 Nov 牛頭角下村踢波
Sat 24 Nov Frances生日 / 買Notebook
Fri 23 Nov 都會彩福 Frances Birthday Lunch / 搵強買Notebook / 旺角上海坊Dinner / APM打機
Thu 22 Nov 淘大搵禮物 / 麥記Dinner
Wed 21 Nov APM吉野家牛肉火鍋 / 葫蘆館薑汁撞奶
Tue 20 Nov 行旺電見到Asus F8Sa
Mon 19 Nov

Sun 18 Nov 馬鞍山至西貢單車之旅
Sat 17 Nov 阿傑生日 / 油塘踢波 / 三家村睇比賽
Fri 16 Nov 去Mega sale 買口立濕 / 高登睇Notebook / 澳洲牛奶公司茠餐 / 獨自漫步尖沙咀至九龍城
Thu 15 Nov 厚福街Lunch
Wed 14 Nov 馬爺生日 / 旺角新世紀湘川滬，馬爺、阿傑的生日飯 / Virtual Zone打機
Tue 13 Nov Tom Lee拎Gigi's Concert飛 / 旺角搵禮物
Mon 12 Nov Gigi's Concert訂飛

Sun 11 Nov
Sat 10 Nov 尖咀Our Wonderland同Ginny & Lonson 補祝生日
Fri 09 Nov 銅鑼灣Small Potato Cafe 分店 Farewell Ricky & Joelin / 幫Actual包禮物
Thu 08 Nov 旺角搵禮物
Wed 07 Nov
Tue 06 Nov 鑽石山Dinner
Mon 05 Nov

Sun 04 Nov 德田踢波
Sat 03 Nov Elsie生日 / Big Time睇波撞到聖言仔
Fri 02 Nov
Thu 01 Nov
Wed 31 Oct 沒事發生的Halloween
Tue 30 Oct Alan生日
Mon 29 Oct 新Office的第一日

Sun 28 Oct 新都城睇柯南電影《紺碧之棺》
Sat 27 Oct Lonson生日 / Big Time睇波
Fri 26 Oct 搬Office M1015到R904 / 尖咀買禮物
Thu 25 Oct Lonson Last Day
Wed 24 Oct 葵芳波濤餐廳晚飯
Tue 23 Oct 馬爺出院 / 終於Sick Leave
Mon 22 Oct 馬爺做手術

Sun 21 Oct
Sat 20 Oct 半月灣BBQ
Fri 19 Oct
Thu 18 Oct 安捷街踢波 / 半夜去聯合醫院
Wed 17 Oct
Tue 16 Oct 青衣同失戀的仁散心
Mon 15 Oct

Sun 14 Oct
Sat 13 Oct 樂華踢波 / 蘭記Dinner
Fri 12 Oct Ginny生日 / Ada 生日
Thu 11 Oct 又一城買禮物 / June Last Day
Wed 10 Oct
Tue 09 Oct 淘大睇《Resident Evil 3》
Mon 08 Oct

Sun 07 Oct
Sat 06 Oct 踢波 / 蘭記Dinner
Fri 05 Oct 譚魚頭 & Bar Farewall June
Thu 04 Oct
Wed 03 Oct
Tue 02 Oct

生日篇：

呢段時生日o既朋友，生日快樂呀！希望今年你地都開開心心、健健康康、順順利利啦！
(依生日日期排列)

Ginny： 出年要早D同妳食生日飯呀，到時齊人一齊玩返日就好啦！
Ada： 我記得妳生日架，遲D約埋Kerina去玩啦！
Lonson： 呢幾個月快D修理好隻腳啦！你速度就快唔過standard架啦！
Alan： Gameweek換人提提你！
Elsie： 努力工作喔，希望呢份會係妳想要o既工作啦！
馬： 腳就醫好啦，快D醫好埋個心啦！
傑： 做野小心D啦，平淡是福！
Frances： 努力讀書啦，希望妳爸爸快D好返啦！

工作篇：

(10月5日)放工同June farewell，雖然11號先係Last Day，不過趁住星期五可以玩耐D！首先去左譚魚頭打邊爐，呢間唔係平時打開果種，係無鼓油供應的，不過就有一碗有芫茜、花生等o既野作醬料(好正，尤其係我勁鐘意食芫茜，但未必個個都o岩口味)，仲有小籠包、水晶包等作為食材，估唔到又幾好食，價錢就比一般火鍋貴，不過我覺得都值o既！之後去左上次farewell Deep果間Bar，玩到點幾兩點就散啦！

(10月26日)o係SMILE唔經唔覺就過左一年啦，終於都有份工我做到一年咁耐啦(汗)，話說舊年o既10月27日係我o係SMILEo既First day，o岩o岩過左一年就係我o係M1015o既Last day啦，因為紅磡灣新office已經啟用，SMILE將會撤離呢個充滿住歡樂o既M1015！Backend的同事們將會進駐紅磡灣，而我地frontend team將會回歸微笑總部R904，收拾好細軟pack晒箱，下晝就有人黎搬過去新基地啦！o係R904，我地frontend四子(Alan、Gill、Sa同我)會坐位一間獨立房間，仲有海景十足《瞬間看地球》咁，個位濶落左張椅都舒服左！不過Frances同Kan就坐左出大房啦，得閒多D入黎探我地啦！

(11月9日)今日係Rikcy同Joelin o既Last day！我地o係銅鑼灣book左間cafe，因為我要落紅磡問拉西借將Pizza Hut九折卡，所以我去到果陣Party已經開始左，食左陣野吹吹水打下Winning Eleven，就到玩集體遊戲o既時間啦，總共分左5組，我果組有Hammy、部長、Jason、Brian、Kobe同我！點知其他組別實在太超班啦，我呢組包尾要接受大懲罰，我同Hammy就要俾人劃花面，部長同Jason就要做交叉掌上壓，Kobe同Brian就住Keroro同Tamama頭套影相，不過就玩得好開心o既！玩到11點個場完左，佢地就繼續落Bar玩！我約左Actual睇Ginny份禮物，就無跟到去啦！

(11月16日)今個星期Poly有Mega-sale，雖然無咩賣，不過就有檔賣口立濕o既，我地成team人走落去買砵仔糕、白糖糕、香蕉糕等等返office，勁爽！

個人篇

(10月6日)踢完波夜晚join埋柏霖佢地去蘭記食飯加睇波，好耐無試過咁多人一齊o係蘭記食飯睇波啦，幾好！

(10月9日)放工約左阿仁、馬、大衛、Lonson去淘大睇《Resident Evil 3》，成套戲無咩劇情可言，只係得兩個字：核突！真係有D失望！

(10月11日)連續幾日放工去睇禮物，又一城都好似係第二日黎啦，Log-On呢期無咩貨賣，不過就俾我o係Francfranc睇到D好野，終於買左Ginny o既Birthday gift，亦補返Actual果份，因為之前送俾佢果份原來佢已經有！

(10月16日)阿仁一早打黎問我睇左巴士司機o既故事未，我開頭仲以為佢遞左辭職信添，因為我從來都無諗過果樣野會發生o係阿仁身上，佢失戀了！我就約佢不如夜晚一齊食飯啦，同埋可以約埋禎哥！點知o係中環返工o既禎哥竟然帶左阿仁入青衣，佢個解釋竟然係：佢鐘意青衣！真係.....，佢完全無諗過我o係Poly入青衣係幾咁隔涉，第二日又係weekday要返工，結果我搭火車入沙田再轉巴士仲一段路先去到青衣公園，一入到去就省左佢一鑊，揀地點俾D誠意啦，又唔諗下人地點入黎，人地問你你要識答架嘛，枉我仲特登同阿仁講話叫埋佢黎，我搭車入去果陣竟然爆左一句：你唔入黎都無所謂！真係當堂無名火起！佢又話o係上面食左赤丸唔係好肚餓，幾乎俾佢激到唔記得入黎係同阿仁散心(佢話我搭車入去的時候已經吹完咁滯喎，無言)！跟住食左唔記得係香辣屋定辣椒屋之類，就走左落海邊吹下水，呢次對阿仁o既打擊都幾大，不過人生總有失意時，只要能夠接受失敗，當中的日子只要係有所得著，都唔算係白過架啦！我諗過一排阿仁就會翻生架啦！

(10月18日)馬爺有場紙o係安捷街足球場，為佢手術前踢最後一戰(天曉得佢之後咁快就踢得返)，放工就搭35A hea入去，點知都仲早過佢地，是日腳傷不能多跑(已經傷左成個月了)，好少上前場，對面後防唔知做乜頻頻犯錯，造就我地呢邊雜牌軍大勝！踢完諗住去食飯，點知泊車果個位原來係條私家路，個閘口俾鐵鍊鎖住左走唔到，結果搞左成大半個鐘，又話報警又話剪鍊，結果叫到個校工鎖先去荃灣食到好夜o既晚飯！返到去沖完涼Lonson就SMS黎話想上聯合睇腳(佢第二日仲要一早去行山)，結果夜媽媽四點幾同埋阿強上左聯合，結果又係無咩睇到，要繼續等排期，就係咁搞到成五點幾先返到屋企！

(10月20日)今日馬爺約左我地去西貢BBQ，中午我就同埋仁、強、馬搭小巴入西頁，join埋放工黎o既Lonson，一齊o係西貢市中心食車仔麵，食完的時候大衛同禎哥都到左啦，只係仲爭一個人；柏霖！原來佢仲未起身，果陣已經係下午3點啦！我地七個就去左問下船，又問下附近D燒烤樂園，仲睇埋D狗仔咬住個波唔放，都係決定按原本計劃去半月灣，我地先去超市買野，估唔到阿強夠膽走左問個佳員工邊度有街市(話說當時我地仲揀緊食物)，之後就梗係去埋街市買食物啦！又問埋船來回都只係300左右！一切都準備就緒，但係，原來柏霖仲未到喎，結果等到5點幾佢終到都開到車入黎啦！就搭左架街渡入半月灣，其實都好快到，船程不過十幾分鐘！入到去個燒烤場已經無乜人，有都係就黎燒完果D，原來果度係無乜街燈的，我地咁晏先入到黎唯有摸黑黎燒啦，仲有D狗呀走黎走去就咁燒到九點幾先call船走！今次黎接我地架船係架艇仔，佢開起上黎簡直係坐快艇o既感覺，中途個船家藝高人膽大o係兩舊石中間穿過，唔使五分鐘我地已經出到西貢啦！跟住搵左間吧睇左場波就走啦，我同阿強就去左得寶食左個拉麵先返屋企！

(10月22日)終於到左馬爺入廠做手術o既大日子，放工就打的上聯合睇佢，原來佢唔係傷半月板，而係傷左前十字韌帶，一條斷左一條裂左三成，叫佢諗下做唔做手駁返佢，醫生仲話佢可能唔使再踢波架啦！佢第二朝就出左院啦，仲o係一個月後，斷左一條韌帶o既佢已經可以踢返波，仲好似以前咁大力添，俾Ronaldo知道真係發佢爛渣都似，哈哈！

(10月23日)朝早起身個人已經係飄下飄下，不過諗住過一陣返到office無野，無理到照返工，點知成朝都好似暈船咁，嚴重影響工作效率，結於晏晝落左clinic睇醫生兼請左半日sick leave，終於要開齋啦，做左咁耐野都係第一次正式請sick leave咋，不過個醫生都話呢D無咩可以做，可能有小小耳水不平衡，開左D止暈丸俾我有需要食(結果我一粒都無食過)！搭車返歸經過淘大買埋生日禮物俾Elsie就返屋企抖啦！第二日梗係復活左啦！

(10月23日)放工約Elsie食飯，過幾日佢就返新工啦，希望呢份工o岩佢做啦，而且佢好快就生日啦，之後都唔知會唔會就到時間約佢，所以預早送埋birthday gift俾佢！我地去左新都會廣場o既波濤餐廳食飯，其實我想去好耐架啦，不過青衣城果間執左，D野食都ok架！

(10月27日)Lonson生日的日子，之前一日出左尖咀買禮物，呢個禮拜佢就Free啦，因為佢已經無o係井欄樹度做啦！呢一日好平淡，照舊去踢波，之後去左big time睇波！

(10月28日)晏晝約左仁、禎、Lonson同拉西o係新都城睇柯南電影《紺碧之棺》，今次個故事幾好，唔錯！睇完去左食糖水，又上左禎哥屋企(佢要俾D叮噹印仔俾拉西)然後就走啦！

(10月31日)好似上幾年都有出去，不過今年o既萬聖節，乜都無做留左o係屋企！

(11月3日)今日同仁、Lonson又去左big time睇波，途中有三人搭檯，竟然係同一屆o既聖言仔，其中一個係鍾記，真係唔講認唔到係佢，佢地原來o岩o岩踢完比賽！阿仁仲撩埋佢地第二日踢波添！

(11月4日)事緣早兩日阿仁出街撞到大周，就約左佢踢波，仲叫埋小健、野盧、昭豪、小峰、麻嚴、禎哥等人加埋Lonson、強同前一日撞到o既余志能一齊o係德隆，好耐無踢呢D場，開頭唔係好慣，後尾都入左一球！之後一齊落左觀塘食譚仔記！

(11月6日)放工同Actual去左鑽石山間《飯廳》食晚飯，原來係一間西餐廳，個氣氛好正，食物o既質素亦都好好，仲有個男人一路彈住結化唱住D英文歌，真係無得頂呀(Actual職業病發搵都間餐廳好多細節仲可以好D喎)，個set dinner包括餐湯、餐包、餐前飲料、前菜、主菜、甜品同飲品，真係勁飽勁滿足！食完野落去冒險樂園玩左陣，就上Actual屋企拎返個o急同機箱走啦！

(11月8日)放工帶左Actual落紅磡，佢好似無行過呢條路咁！跟住我自己就出左旺角睇下Lonson同Ginny o既禮物啦(大家夾果份)，點知行左一晚都係無乜收鑊！

(11月9日)Ricky同Joelino係cafe個farewell party完左，我就上左Actual屋企幫佢睇下Ginny份禮物，一睇，嘩！真係正，真係好佩服佢o既心思，呢種style我真係無諗過！不過佢有時就係太急，不過總算合力包好左份禮物(雖然有D位仲有D瑕疵)，睇佢個樣病到聲都變埋，更加係服左佢，哈哈！結果兩點幾三點我就返屋企啦！

(11月10日)今日約左大家同Ginny & Lonson補祝佢地o既生日，七點鐘我、Actual、Ginny、禎、馬、強、大衛就到左啦，好快仁同Lonson都到埋，剩返柏霖原來未起身，結果就無黎到啦，呢間《Our Wonderland》係柏霖推介o既，D野幾好食，我最鐘意係個Cheese cake，食完野送埋禮物，我地就拉隊去左天星碼頭附近間機舖打機，大約一點先走，果陣剩返我、Actual、Lonson、強、馬同禎，等綠van又勁多人，於是我地就行去旺角搭紅van返去啦！

(11月12日)上星期無意中發現Gigi會o係12月開concert，幾日都無人話有興趣一齊睇，終於又係我自己一個買飛睇，今次地點o係博覽館，我都未去過呀，見到個舞台會係三面台，一係買最貴一係買最平飛架啦，發現竟然有正中間位又唔算太遠喎，就買左強480飛啦，真係夠我睇3次concert啦！不過人一世物一世，忍痛買左落黎，今次又係我好少會做o既online買飛！即晚諗住去Tom Lee拎啦，點知佢話8點關門，我7點55分去到竟然已經關左門熄晒燈，真吹脹！

(11月13日)lunch time終於去尖沙咀間Tom Lee拎左飛啦，YEAH！放工同禎哥、Lonson去搵禮物俾阿傑同馬爺！首先去左西門町食住諗買乜，不過都無咩意見，期間Lonson問起禎哥果篇xanga，禎哥只係答左一句：係呀！我係從都無放低過！佢呢D固執宜係無咩可以講啦，所以我都無同佢講過咩，咁大個人，自己識諗啦！結果兩份野都係我提出黎，好彩都仲買得切，不過我覺得可以做得好D囉，例如一早知買o既就早D諗定D選擇丫，出到黎竟然連idea都無，點得架！

(11月14日)馬爺生日o既正日，我地夜晚去左旺角新紀湘川滬食生日飯，同時都幫阿傑搞埋，因為佢正日要開工！出度o既有我、大衛、禎、馬、朗、傑、強、Lonson、柏霖，禎哥唔知點解摷左好多張coupon出黎，犀利！呢度D野都幾好，跟住仲有呢個壽包crossover蛋糕o既中西合壁切餅儀式，禎哥好似只係為左影相...仲有佢插candle o既方法簡直係出人意表！跟住返左九龍灣Virtual打左陣機就散啦！

(11月15日)今日阿強、Lonson、馬爺三個竟然出黎尖咀搵我食lunch，真係好出奇呀！阿強月頭又陪埋Lonson放悠長假期，馬爺呢一日sick leave喎，就係咁4個人去左厚福街食野！

(11月16日)今日放左去一個人走左去深水土步睇notebook，俾我見到部新機出左，問過下價有一間係below我budget，另外又有一部差唔多價不過係另一個牌子，不過都基本揀左呢兩個model啦，返去再諗下搵下資料先，之後突然興之所至去左佐敦o既澳洲牛奶公司食茶餐！食完又唔想咁早返歸，就行左入九龍公園、然後經過諾士佛台，果度D環境真係唔錯，第日有機會要去試下，跟住就行左過尖東，再穿過火車站去到紅磡，繼續行下行下去到馬頭圍，Actual打黎話佢o係九龍城飲完野，就搭車join埋各自回家啦！

(11月17日)今晚馬爺佢地o係三家村有比賽，我地約左早D去踢下波先，阿強同Lonson搞旅行D野好夜都未黎得，我同仁、馬就過左去先，見聖安當個場有人踢就問人地"侵"埋玩，到強、Lonson黎到，就行過去三家村，踢左陣細場就過去大場睇佢地比賽啦(禎哥都到埋)，馬爺佢地先落後一球，但係再開返波馬爺就o係中圈屈機式射入，跟手佢再助攻阿健反起前完半場，不過去到下半場，場面越見火爆，最終對手把握馬爺果隊o既錯誤，連入兩球反勝，期間柏霖仲因防守撞中門柱，好彩無咩事，不過個焦點竟然o係觀眾席，維園阿伯就唔好講啦，禎哥唔知做乜好燥，見馬爺佢地輸波又?地又踢水樽，好彩無踢到人，但係佢好似食左火藥咁，連落場D球員都無咁大反應！最後大家去左萊發食飯先走！

(11月18日)今日約左馬爺、強、Lonson同禎哥去踩單車，一早起身去左祥榮食左個早餐先，跟住就入去火炭租車啦，殊不知間舖竟然咁o岩休息喎，禎哥竟然話不如去雀會，真係傻架，晨咁早起身去打雀，結果我地o係馬鞍山租左車，跟住出到路口，禎哥話想試下踩入西貢喎，咁大家都覺得無問題就更改左行程入西貢啦。話說之前一日，馬爺、強、Lonson同我都踢完波黎，禎哥應該係體力最好果個黎丫，點知我地連烏溪沙站都未到，禎哥就大喊好累，想返轉頭，我地當堂O晒咀，但禎哥都係繼續踩落去，但當我地去到西徑村附近(大約行左三分一之四分一路程)，禎哥又話唔掂啦，叫我地不如踩落邊就掉頭走，跟住有人就話可以call貨van出黎，禎哥思前想後，又決定繼續踩啦！去到水浪窩小歇一下之後，好快就入到西貢啦！話說呢段路我地四個都係踩一個巴士站停一停等禎哥跟住又一個巴士站再等！中途仲發生左兩件事，第一單係我地o係路邊等緊禎哥，突然有架私家車剷上黎泊車，佢又唔響號又唔打燈，o係馬爺身邊大約一尺o既位置就左上路邊，雖我我地果陣已經停低左，但假如我地一起步就肯定炒車，勁危險，但咁都唔止，佢架車上黎霸晒成條路邊，仲要大無私樣咁慢慢落車拎野搞哩搞咯，咁都算啦，咪俾你地搞掂先囉，佢地搞左好幾分鐘，個司機竟然不但一句"唔好意思"、"對唔住"、"唔該"都無，仲要射哩眼啤住我地，我地無理到佢，但佢架車阻住晒行唔到，咁無理由行出馬路只好行上山邊繞過架車啦，個司機竟然借D返轉頭驚死我地整佢架車咁，真係一肚氣呀，邊庶有人咁無品架！第二單係禎哥當時跟住馬爺，我就跟住佢，之後就係Lonson同阿強，條路已經好窄，只係夠一架車過，禎哥又踩得好慢，Lonson就大叫佢踩快D，禎哥聽到突然間急停，差D害死我地，好彩我都唔係跟住佢好貼(不過Lonson跟得好好近，我都唔敢急剎掣)，之後咪話佢呢D位咁樣急停車好危險，跟住佢就發爛渣，標左去啦，踩緊馬路架大佬，你咁發脾氣出左事點算呀，真係無佢乎！好啦，入到西貢，禎哥終於頂唔住抽筋(但係我又覺得好輕鬆喎)，我地又去返上次BBQ前果間車仔麵度食野，跟住買埋六合彩，仲問埋貨van出返出幾錢，大家見價錢咁平，諗都唔諗就決定左踩入北潭涌！點知一離開市中心，禎哥踩住架單車過馬路又唔睇車，差D俾架的士撞倒，我地梗係話下佢架啦，佢又話；我諗架車一定會停俾我，真係俾佢吹到脹一脹，發覺呢次行程真係危機四伏！我地過左大網仔，禎哥就不斷地抽筋，終於去到近大網仔村，見到有間士多就停低左，禎哥諗左陣終於舉白旗啦，終於5個人就call左貨van出返馬鞍山，點知出返黎禎哥隻腳好似乜事都無晒咁，又踩左去科學園來回，回程果陣去到馬場對面，Lonson架車尾牙壞左踩唔到，就陪佢慢慢推返去交車！之後去左維苑餐廳食飯，就完左呢一日神奇o既單車之旅啦！

(11月21日)呢幾日阿爸阿媽去左黃山旅行無飯開，放左工就去左apm吉野家食牛肉火鍋，之後仲去埋葫蘆館食薑汁撞奶，真係一流！

(11月23日)本來放工諗住去水土步買notebook，阿強話識人買仲平成千幾蚊喎，咁就梗係制啦，就等埋佢出黎同Actual三個食上海坊，點知原來佢個fd賣果架係舊model，咁我梗係唔要啦，但咁夜又無返過返高登就返左觀塘打機啦，Lonson都join埋我地，仲有幾乎返到將軍澳o既禎哥又返出黎，不過好似無乜mood打機咁，禎哥就要個跳繩機，不過佢好似完全玩唔掂！

(11月24日)終於去左高登買notebook，就係上星期睇中果個新model ASUS F9S，多得阿強同Lonson幫下眼，夜晚就同Lonson、仁去左Big time睇Newcastle VS Liverpool！夜晚搞notebook搞通頂，restore左個system N咁多次，原來係個firewall撞左，而家唔裝就無晒事啦！

(11月25日)馬爺book左場踢波，我仲叫埋阿Sa一齊黎，不過今日個焦點又係吳國禎，佢分隊果陣已經唔知做乜發晒脾氣，之後俾阿強笠死仲連環做出大力踢個波，再踢門柱，然後走埋場邊撕碎左個白鞋盒，真係嚇死人，佢走果陣仲係聲都唔聲就閃左，都唔知佢想點！不過今日同大衛、朗都撞左野，希望佢地無事啦！然後食左好食o大排檔先走！