5月30日

東壩、麥理浩徑二段的大浪灣海岸被譽為香港最美麗的海岸之一，我對呢度其實嚮往已久了，不過一路都無機會去！果度無車到，只可以行入去，單單係麥理浩徑二段己經長達13.5公里！之前朋友約左去又因為腳傷最後無一齊行，只好再等機會去啦！

一直都唔想自己一個去行山，無人照應存在一定危險性，而且早年多左非法入境者打劫行山人士的事件，更加對獨行卻步！但係搵人一齊行都唔易，相熟的朋友唔係已經去過就唔鐘意行山，而且得自己又唔想貿貿然約女仔同行，始終安全問題，對方都有可能會介意！不過大浪灣東壩又真係好想好想去，講左咁多年都去唔想，真係唔想無限期咁等，所以的確有考慮過自己去行下o既可能性！

呢幾年有打算離開香港去下旅行，外地有唔少美景都要行少少山先可以到，所以除非放棄個景點，唔係就要有行山的可能性！同樣，要搵到旅伴都係一件唔容易o既事，即是好可能要自己行啦，當然人生路不熟唔會揀D難度太高同埋會搵齊資料o既！既然係咁，先試下o係香港自己行下評估下自己能力啦，早前就o係中環行上山頂o既，稍短o既路程都OK，可以再試行多D！

早幾日見到朋友在東壩的相，又燃起了去影下相o既衝動，睇下搵個禮拜日可以去果度行下！

星期六，竟然七點半起就左身，早幾日都是天雨連綿，溫度無咁熱，天氣預測是多雲間中有陽光，似乎可以行一轉東壩，就帶左兩部相機(只係S3IS同IXUS 40，唔係大機)同小型腳架，同家人吃過早餐便出發了！先買左支430mlo既礦泉水同支裝Pocari，唔想拎咁重野行山嘛！計劃係o係西貢搭村巴29R到西灣亭行到東壩影相，到左西貢差唔多十點，下一班村巴卻是十一點半，便到碼頭一帶行下，o係巴士站見到94正開始上車，突然諗反正咁早，29R要等多個幾鐘，不如上車去北潭凹出發逆走麥理浩徑二段，在日落前行完應該無問題，至於最擔心的安全問題，睇下會唔有有同車o既人都會咁行跟住都應該OK，因為都見到一D似係行山o既人上車，就算去到無人最多咪返出黎搭29R或者入去黃石碼頭駁船去灣仔半島行又得！

十點多D就到左北潭凹，落車o既都有十幾廿人，先去睇下漁護處個地圖，有兩個好似係留學生的男女似乎要行去西灣，打了個招呼他們便先行了，我行下又影下相咁唔係行得好快，不過間中都會行快少少直到見到果兩個人，至少有咩事求救可能佢地咁近D會聽到嘛！沿路經過赤徑、去到大浪坳就有一班行山人士休息緊，果對男女停低左討論行程，我唯有一個人繼續行啦，中途趕過了兩個小男孩，似乎得十歲左右，前後又無其他人，真係佩服！行左一個鐘多D終於到左鹹田灣，o係士多前稍作休息影下相，S3IS已經無電了，還好出黎之前買左排電芯，唔係就慘啦，不過咁快就要換電，好擔心一陣唔夠電再影！士多老闆好好人話我知前面山路影相好靚，可惜時間咁早無幫趁到！由鹹田灣到西灣一段路真係靚到暈，行兩步又忍唔住停低影一大輪，呢個時候雲散了，又近中午天氣開始熱，相機都開始熱埋一份，真係一路行一路話：天呀，有無咁靚呀！咁搞法都唔知用晒D電定係用晒張記憶咭先囉！去到西灣差唔多一點，經過士多買左支豆漿，因為Pocari早o係鹹田灣被消滅，不過天氣熱未上到吹筒坳就飲晒！

去到吹筒坳時間還早，西灣亭出西貢的村巴無咁早有，就決定如計劃到東壩，原本諗住兩點至三點左右去到，點知呢段路係失算的！o係大大個太陽下，直到呢度為止所行的絕大部份都是水泥路，但係呢條上山之路都係山徑，有D地方似乎因為早幾日落兩有D泥濘，加上行左咁耐開始攰，大脾肌肉開始有酸o既情況，加上條路稍為崎嶇，又曬又斜行得份外辛苦，行左一段覺得好似係無止境o既上坡，手都無力拎住部相機影相了，幾經辛苦先到左山頂，大脾已經痛到在抽筋的邊緣，只有就住行唔好俾佢抽筋，因為一抽筋真係唔駛行落去打電話叫直昇機都得啦！到浪茄已經三點，明顯比預想行得慢，水都飲晒但係浪茄並無地方可以買野飲，還好再行一段就到東壩了！拖著疲憊的雙腳走上階梯，行十幾廿級就要坐低抖抖，見到有個外籍爸爸揹著兒子行上黎，真係好犀利，我自己行都覺得辛苦，佢仲要揹住個小朋友！終於未夠四點到左東壩，仲有十公里先到北潭涌，東壩上停左幾部綠的，呢一刻真係又曬又攰，水又飲晒，雖然話跟住都幾乎係平路，不過如果中途抽筋就唔知點截車囉！都係搭車穩陣，不過先來回大壩影D相先，話晒都係今日o既主菜呀！再返到的士o既隊伍前...之前果大堆人竟然無晒，仲諗住搵唔搵到人share車錢，唯有自己一個包車走囉，去北潭涌要六十幾蚊，都唔平，不過接受到啦，夜晚仲要踢波，要休息一下！

總結一下今次行程，大致上都成功不過有D細節係要檢討o既！首先係裝備，應該帶帽同毛巾...太曬了！水唔夠，搞錯左原來浪茄係無士多的，灣山的路是意料之外，睇得資料多就有少少掉以輕心無o係出發前再check一次！o係差唔多到鹹田灣其實我係行錯路的，雖然也沒問題沿路亦影低左路標，不過應該都係帶返張地圖會穩陣D，o係西灣都搵唔到路，不過清楚要横過沙灘也沒大礙，但其實本徑係o係唔係o係沙灘上！腳架完全係廢o既，剩係用黎影左張自拍，路太長花唔起咁多時間影相！東壩到北潭涌一段又係好曬的，今次搭了車，問過司機先知剩係假日有的士，應該事先準備call的士電話！

今次行山沿途見到其他人都會主動打招呼，來個"早晨"、"Hello"就好，大部份都會友善的回應，除了是種禮貌，也可從對方的反應稍稍判決有沒有危險，另外因為是獨行，打聲招呼可以令佢地留意到我，真係大吉利是出左意外都可能有人會認得我搵人救都易D！不過呢一路可以睇得出，會回應的多是熟練的行山人士和外籍人士，結隊而行的香港人反而很多都不作回應，尤其係比較年輕的人更是如此！說實話，打個招呼行起上黎都覺得有點兒親切，至少不會有種孤單一個在走的荒涼，真的會提升士氣哩！

大浪灣、東壩，我一家會再去影相！

繼續係Easter的假期，今日都係"閒"日，有諗過今日上山頂行下，結果當然係無上到去啦，而係行左好大個圈！

食完lunch自己行下行下去左觀塘碼頭，等左幾個字終於有船過西灣河，呢排好似成日搭呢條航線，可能覺得扺D卦，落左船就轉叮叮，一路坐到去灣仔，再坐巴士入淺水灣！我係特登揀呢條6號線黎搭，因為佢係行山路而唔係行香港仔隧道，隨山而行風景真係好靚，差唔到到黃泥涌水塘一帶見到一大片網球場，突然間同我印象中輕井澤的模樣重疊了，之後轉入淺水灣道，沿路落山真係靚到不得了，不枉我特地要行呢段路，不過有機會的話，慢慢沿路步行可能更加美好！好快就到左淺水灣，原來司機會o係到站的時候用英語大喊"Repulse Bay"，果真是一個熱門旅遊點，我想駕駛南區巴士線的車長的英語都應該不多，因為我見到很多遊客會向他提出詢問！淺水灣諗落都真係好多年無黎過，今次黎到，覺得淺水灣竟然係咁靚，當然總是有些"人工"味啦！沿岸而行，有一條小徑通向深水灣，風景都不錯，可以悠閒的慢慢逛是不錯的，很多人都帶狗隻到此散步，一路大多都不是華人，不過他們都是十分友善，比起市區裡，今天的這段路很有"人"的味道！到了深水灣，不多停留搭車到赤柱，但係呢個赤柱卻令我感覺比以前不喜歡了，我的感覺是，最有赤柱味的就是赤柱廣埸對出的石灘，遊人可隨意地走下去，隨意的找一塊大石而坐，做喜歡做的事，但今日卻築了個石屎的地台，很可惜！行了一會，打算回程，卻遇上回程的人潮，14號很多人，便坐了稍空的314到了藍灣半島，車長在大潭道的駕駛讓人很放心，由他每一個彎位到會先減速和閃著車頭燈示意，讓人感覺他是個謹慎的司機！在藍灣半島猶豫著直接坐606回家還是搭8P到銅鑼灣找點東西吃，最後卻搭上了85到西灣河，剛好接上了到三家村的航班，然後慢慢的走回家！

渡輪(觀塘-西灣河)[4.8]
電車(西灣河-灣仔)[2]
城巴6(灣仔-淺水灣)[7.9]
城巴973(淺水灣-赤柱)[4.8]
城巴314(赤柱-小西灣)[6.9]
城巴85(小西灣-西灣河)[3.7]
渡輪(西灣河-三家村)[4.8]

今日，一個人入左荃灣拜山，亦都係第一次自己一個去！清明之前已經一家人去長生店拜阿媽，今次係去拜阿爺、阿公同舅公！阿爸話佢今年唔想拜，仲有另外一D原因，都係自己去拜，只係無定到日子，應該都係Easter搵日啦，今日又無野做，下晝食完野就搭小巴過左去，o係荃灣買左札香就轉另一架小巴去到圓玄學院！哩度對我o黎講竟然係如此的熟悉，數返起o黎呢度拜山都成廿年了，細個果陣係成家人連埋親戚十幾廿人一齊o黎，基本上都會留足一日，但漸漸就係自己屋企五個去拜，亦都由一年幾次變成一年可能得一次兩次，而今日...就得我一個！因為呢度o係清明、重陽呢D拜山日子o既正日，通常都人山人海，小巴排長龍，仲要半路落車行上去，所以好少會o係正日黎！今日先知原來圓玄學院五點就關門，我四點幾去到，剛好趕得切，拜舅公時果度的員工叔叔已經正在關門，幸好佢都特地開返俾我入去上香鞠躬，真係多謝佢呀！無乜點逗留，真係上香同鞠躬而已，也不知道要/應該做些甚麼，我想入去到走都無半個鐘！之後即興入沙田搵左阿姨食飯！

關於拜山

點解要拜山？原來都唔係一個簡單o既問題，係為左死左o既人，定係為左自己？唔知！人死左會點，更加無人知，傳統上，中國人死後，後人而為先人上香，奉上祭品，燒金銀衣包俾佢地！近年多認識了一些有宗教信仰的人，他們不會上香、燒衣，因為o係佢地o既角度，人死左會上天堂！也不是誰對誰錯，只是不了解，不能了解，不可能了解人死後會是怎麼樣！我無特定o既宗教信仰，但也沒有對傳統的習俗完全的認同！不可能了解，認只好用自己有的資料去理解吧！人死了會不會上天堂，會否轉世，到地府，沒辦法確認，換轉來說，這些對生存的人，也許不重要就是了，死了就是死了，這是唯一的事實，那麼一切的儀式更加顯得不重要了，反正儀式對先人的結果也是不可能了解吧！但是，我還是去拜他們，因為...這些都是親人，我們的生命都是有聯繫的，又可能是一個保險，萬一哪個習俗、儀式是真的，也曾經做過點其麼吧！但我也是是上香和鞠躬而已！我認為這一點事是對先人一個敬意，因為這個先人仍在我的心裡面活著！但那些祭品、燒那些一包二包的我就不會了，如果是祭品，拜完之後拿來吃我可是接受不了，既然這樣，我不想浪費食物啦！燒衣包的事，在那些東西能不能交到先人的手之前，好像就是浪費紙張，搞得漫天煙火，還為暖化的地球再添溫暖，哪怕是這麼一點點，真的不願意做這個可能是破壞地球的共犯，所以上香會是我的一種妥協吧！說到底，我拜山也許就是這樣子的自私，拜祭更多是為了自己的感受，勿論這是誘因、過程還是結果！既然為先人造了靈位，就沒有不拜的理由，不拜而立靈位是完全的無意義，如果你認為人死了不用拜祭，不用憑弔，我建議你就不用想要設靈位，立墓碑等的事了，因為這根本沒有任何理由去做喔！而我...會繼續自私下去，滿足著自己的"孝心"，因為...我真的很自私！

關於死

死，是人類"生存"的最後一刻，一個階段！死後的事，就如前述，不可能了解，那就不重要了！那麼，如果有一天我死了，會想怎麼樣呢？不重要的不說，因為我認知的只有現在生存著的這個世界，就想想有這個世界裡會怎麼樣啦！是的，我以為人死了和從此在世界消失了沒有兩樣，也不用在這個世上留下甚麼實在與不實在的東西，甚至一些"曾經活著的証明"，死了之後就完全的沒重要了，最重要的都"經歷"過了，哪用再"留下"些甚麼呢！我會覺得如果死了的是我，靈位墓碑之類已經不重要了，甚至骨灰，也不過是一堆地球上的"資源"吧！再遠一些，由死亡的一刻，連肉體都已經不再重要了，人之所以為人，不過是那捉不到的所謂"靈魂"，那可能是是腦裡的一些電流作用吧，身體的任一部份，終點還是我們可以量度的份子，這一點生物與死物無相異，但生命就是竟然能藉著"意志"一類的不實在物控制這些份子，所以，我認同生命可以稱之為"奇蹟"，死了，"奇蹟"不再，"重要"的都不存在了，以後剩下的東西，就是生存的人控制的了！當然，我絕對不反對去辦儀式，活著的人有著好好安葬先人的權利！這樣的話，活著的人，就自私下去吧，自私，是因為我們都有感情喔！